PADUAN SUARA GEREJA (Bagian I)
Pt. Julianus P Limbeng,
(Seksi Musik dan Paduan Suara GBKP Klasis Jakarta-Bandung)
Bena Kata
Adi sinen piga-piga paduan suara si lit ibas gereja GBKP, rata-rata lalit sitahan ndekah. Bagepe arah segi jumlah reh dekahna reh sitikna anggotana. Adi menaken lit anggotana 100 kalak, dungna tading 10 kalak, seh pe bubar. Bagepe paduan suara enda teridah tupung wari-wari penting gerejawi saja, misalna wari natal, paskah, pentahbisen gereja, bagepe entah lit festival paduan suara. Lit kecenderungen sifatna temporer. Engkai maka bage ? Enda tentuna lit piga-piga hal si jadi maslahna.
Masalah e la hanya ibas anggota paduan suara e nari, tapi lit kaitenna ras pemimpin paduan suara e sendiri. Erkiteken paduan suara e menyangkut hubungen manusia ras manusia ibas kelompok rende muji Tuhan. Lit ije faktor-faktor sideban sierbahanca megati paduan suara e la ndekah nggeluh entah pe temporer saja sifatna. Faktor-faktor e emekap, (--amin gia enda sebagai asumsi entahpe hipotesa saja sifatna--) pengangkan kerna uga pentingna rende ibas gereja, kurangna tenaga ahli ibas bidang musik, komitmen gereja entah pe perpulungen si kurang ibas mengembangken paduan suara, pemahamen rende sebagai pujin man Tuhan, faktor budaya Karo pe erperan galang, bagepe ‘kebijaken’ ibas gereja nari kerna musik ras sidebanna.
Mulai ibas edisi enda, ate kami maka lit terus ibahan kami tulisen kerna paduan suara, bagepe musik secara umum. Kira-kira kai perlu sieteh, bagepe man pekenan ibas kita mengembangken paduan suara ibas gerejanta. Emaka tulisen enda sifatna bersambung, janah sijadi pembahasen pe lebih terfokus (idiosinkretis) ras lebih mendalam ibas bidang-bidang sini ibahas.
Dirigen
Paduan suara biasana ipimpin sekalak dirigen entahpe rusur ka ikataken conductor, entahpe choirmaster. Biasana ibas gerejanta sekaligus ka nge ia sebagai pelatih. Adi inehen arah hakikatna, maka sekalak dirigen paduaan suara (koor) arus lit standar kualitas musik ras non musikalna gelah paduan suara e banci mehuli. Kualitas musik sifatna, eme kerna penguasaanna kerna teori-teori musik [Barat] bagepe praktekna. Praktek sini imaksudken ijenda lebih dominan kubas teknik vokal ras penguasaan instrumen musik, misalna piano entahpe organ. Amin gia labo mutlak kel, tapi simejilena min bage, entahpe solfegiona mejile.
Isamping kualitas musik si mejile, kualitas non-musik pe situhuna penting kel ikuasai sekalak pemimpin paduan suara. Jadi dua faktor enda arus saling mendukung gelah paduan suara e banci erdalan.
Kualitas Non Musikal
(1) Lit bakat pemimpinna gelahna anggota paduan suara e tek dingen nggit mbegiken rananna. Emaka sekalak pemimpin paduan suara arus beluh bergaul, la kaku, gelah kalak nggit ibas teruh perintahna;
(2) Motivasi ras komitmen, eme salah sada kata kunci ibas mbentuk ras mengembangken paduan suara. David Hill [adi bahasa Karona, Daud Bukit] ngatakenca “kemampuan sekalak dirigen ibas memotivasi paduan suarana tergantung kubas motivasi pribadina jadi sekalak dirigen. Adi motivasina kin pe untuk gelarna sendiri, e biasana kurang jilena.
(3) Taktik “tact”, eme pang ngataken salah kalak, tapi alu cara si payo gelah sierbahan salah e la megelut. Memang enda agak mberat bas kalak Karo. Adi sikataken salahna ilebe jelma sienterem e banci nembeh atena ngenehen kita, janah wari pepagi lanai ia reh latihen pe. Jadi arus kita bujaksana ibas nehken salah na e.
(4) Mengembangken cara latihen si efektif, efisien, menyenangken bagepe la mesunah merawa. Emaka situhuna sense of hunor sekalak dirigen arus lit, tapi arus beluh nempatkenca ija gelah ula lit kesan latihen e main-main. Tole pe nina David Hill, perlu nge sekali-sekali memang pemimpin paduan suara e naikken intonasi sorana, tapi ula alu emosi si berlebihen.
(5) Sekalak dirigen arrs min beluh mbina hubungen mehuli ras kerina anggota paduan suara siibinana. Banci pe luangken waktu ngerana-ngerena ras sekalak-sekalak ibas waktu tertentu. Perlu sungkuni pendapatna kerna paduan suara e sendiri, misalna uga perasaanna, alu bage maka setiap individu merasa lit gunana ia ikut ibas paduan suara e. Contoh si kitik umpamana pujikenlah ia ibas rende mejile, entahpe ucapken ulang tahun man bana, adi kin ia paksana berulang tahun. Lit teori ngatakenca, nina si menjadi daya tarik paduan suara e eme kepribadian dirigen si simpatik.
(6) Perlu kel menjaga wibawa entah pe dolat daging. Sekalak dirigen sierdolat eme adi ia rusaha la ndarami keuntungen guna ngangkatken dirina pribadi, tapi nggit rutang pusuh guna pehuliken paduan suara e secara utuh.
(7) Arus lit optimisme janah la erlatih-latih bagi kai nina Jean Ashworth Bartle : “Segala sesuatunya berasal dari hati, pikiran dan jiwa seorang guru. Harus ada ras keranjingan dan hasrat untuk seni yang mengarah ke rasa fanatik. Haruslah juga terdapat optimisme yang tidak kenal lelah. Harus memiliki karisma yang dengan tulus sungguh menginspirasi orang lain”. Beluh gia kita teori musik, praktek musik, cukup berbakat, bagepe penguasaan teknik rende, adi motivasinta la mejile, maka ugape paduan suara e rontang.
Kualitas Musikal
Adi ngelatih paduan suara, arusna min lebe kita enggo ngkuasai lagu sini iajarken, ula ilebe-lebe anggota e ka kita erlajar. Emaka alu bage tanda-tanda si lit ibas partitur e arus jelas lebe, gelah ula erpengakap-pengakap.
(1) Tandai bagian-bagian sini iakap susah ngendekenca, janah pastiken kita sebagai pelatih enggo beluh ngendekenca alu ‘pas’. Adi lagu e enggo kuasai, maka ibas ngelatih pe la rusur ke lalap ngenehen ku partiturna.
(2) Pelajari lebe kerina lagu e, janah ija kin arus tarik napas, frasering, bagepe artikulasina rikutken bahasa sini ipake lagu e.
(3) Tandai betul-betul dinamikna, amin gia ibas partitur e enggo itulisken, gelah tuhu-tuhu lagu e banci iendeken sue ras sura-sura sierbahanca.
(4) Intepretasiken lagu e sue ras gaya masing-masing, contohna: tempo (pedas entah lambat), dinamik (megang entah la megang), penekanen kata-kata, ras sidebanna.
(5) Arus meteh kualitas paduan suara e sendiri, gelah hasil sini iarapken banci tersehi, janah penampilen si kuga iarapken arah paduan suara e nari.
(6) Memilih tempo si pas. Enda perlu, gelah ibas rende teridah maka la ipaksaken.
(7) Kemampuan mbedaken not seper waluh, seper empat, ras seterusna.
(8) Pembegi arus mejile [mehuli]. Banci minter sibedaken sora salah ras benar. Enggo payo endekenna sue ras notna entah lang.
(9) Kemampuan sight singing, artina banci ngendeken lagu e mulai ibas si mesunahna nari seh si ku paling susah.
(10) Memahami ras mengerti proses harmoni, kadensa (nada siperpudi ibas garis melodi) bagepe alur melodi secara teoritis.
(11) Kemampuan menilai, enggo me payo lagu e iendeken entah langa. Emaka simejilena min sekalak pelatih paduan suara bagepe sekaligus pemimpinna ngkuasa salah sada lah gia min alak musik melodis (ula ritmis).
Enda me lebe si banci ipeseh guna hal-hal siperlu lit ibas sekalak pemimpin paduan suara. Ibas edisi berikutna isambung kami ka topik siterkait denga eme “Kemampuan Praktek Vokal”. Bujur. Karawaci, 28 Juni 2006.
Thursday, November 09, 2006
SIBAYAK LAU LIMPEK
Drama Permata GBKP Bekasi 2005
PENGULU LAU LIMPEK
Karya : Pt. J.P. Limbeng
Sinopsis :
Drama enda menceritaken kerna sekalak pengulu singuda denga, entahpe anak perana denga, janah agak ngulah sitik. Ia iangkat jadi Pengulu nggantiken orang tuana erkiteken orang tuana enggo leben dilo Dibata, erkiteken sakit kolera. Ibas kengudanna e, tentuna ia membutuhken bimbingen, eme bengkilana. Janah bagepe perempona pe man aturenken, sebab perlu lit kemberahenna. Amin gia si Lombit sebagai Pengulu nguda, janah kurang pemetehna erkiteken otakna kurang kencer, tapi erkiteken pengarak-ngarak Dibata, maka kepemimpinenna erdalan alu mehuli. La kepe gegeh manusia sierbahan, tapi bekas penjujuri Dibata.
Drama enda ikemas alu penuh humor, tapi pe penekanen theologiana iusahaken kental. Drama enda tentuna fiksi saja sifatna, entah pe lit seri gelar ibas drama enda, tentuna secara kebetulen saja, janah labo lit sitik pe maksud-maksud tertentu.
Scene 1
Pa Raja Ngaku
(Idatas panggung teridah Bengkila Lombit ras Bibina alu rukur janahna njemak isangna, erdalan-dalan ia, janah tatapna ndauh, tempa-tempa gulut kel ukurna).
Jadi uga dage Mak, ma enggo sikap kerina banndu ?
Nd. Raja Ngaku
Enggo Pak e, minak tualahna pe enggo kupesikap.
Pa Raja Ngaku
Uga kin akapndu permenta e, enggo me akapndu banci ?
Nd. Raja Ngaku
Banci kai kin nindu e ?
Pa Raja Ngaku
Banci…., jadi pengulu kuta enda..
Nd. Raja Ngaku
Ajari bancina nge Pak e, jong nguda e pe adi paraken metua nge.
Pa Raja Ngaku
Entah sikapen nge aku jadi pengulu ateku Mak.
Nd. Raja Ngaku
Oh…, kam. Ula kam bage ya…
Kelawesen Kaka Tua ndai pe sedak denga kuakap ngukurkenca.
Pa Raja Ngaku
Entah nge ningku ndai, gelarna pe entah…
(Terbegi sora tanduk darat nari ras sora penganak, janah juak-juak erlebuh, janah empat kalak ngelanja Pengulu Muda sitergelar Lombit Pengulu Lau Liimpek, iarakken anak kuta. Rombongen e siikut eme, Nande Lombit, 4 kalak juak-juak, Ngapeh, mamana, bagepe Pdt. L.``Boodan, Belanda nari, sekalak sinngkipasisa)
Juak-Juak 1
Momo…. Momo….!! Pengulu Muda mentas…. 3 x
Pa Raja Ngaku
Iakh… enggo reh permenta ndai Mak, sikap kita.
Juak-Juak 1
Momo…, Momo… Pengulu Muda mentas…..
(Rombongen Pengulu Muda bengket ku panggung ilanja 4 kalak juak-juakna)
Juak-Juak 2
Dolat Pengulu ! Nusurken, nggo kita seh.
Lombit
Nggo dage kita seh Koro ?
Juak-Juak 2
Dolat Pengulu ! Enggo seh, nusurken Pengulu….
Lombit
Mejuah-juah Bengkila, Bi…, (angkatna tanna). Nusur dage aku Bi ?
Nd. Raja Ngaku
Ue Lombit, nusurken dage permen Bibina. (Langsung tangis)
Hu……, uga denga kel nge permen bibina, adi Kaka Tua enggo lawes…
Kam pe kuidah labo dem kel sengkibul, uga nge nindu pagi minpin kuta Lau Limpek enda turang..
Hu……, hu….
Lombit
Ngandung kam e Bi ?
Nd. Raja Ngaku
Uga denga nge deba kuban man bangku Kaka Tua, bekas penadingkenddu e..
Lombit …., permen bibina…. Hu….
Pa Raja Ngaku
Enggo me Mak. Enggo, enggo.. (ia pe mis ngandung)
Hu….., Uga dengalah e Lombit ? Ngasep nge kam e Permen ?
Lombit
Ngasep Bengkila, adi nusur kel nge katandu, enta lompat gia aku pe.
Satu…, dua…., tiga……(nusur ia ibas kursi tandu nari).
Juak-Juak 1, 2, 3, ras 4
Hidup Pengulu…., Hidup Pengulu….., Hidup Pengulu…..!!
Lombit
Eh…, deh kam ngasup nge aku nusur Bengkila…
Juak-Juak 3
Dolat Pengulu. Kawilndu Pengulu…. (janah mereken moran)
Lombit
(alokenna, mis tak-takkenna)
Tang-tang peret gebek-gebek….., enggo dat sada nande Biring
Bengkota kari…..Hu….
Juak-Juak 1, 2, 3 ras 4
Hidup Pengulu….., hidup Pengulu……
Pa Raja Ngaku
Yach… labo bage Nande Raja Ngaku. Adi enggo me sikap kerina, siaturken dage, gelah sibenaken acara penangkuhen permenta enda ndai.
Nd. Raja Ngaku
Enggo Pak e. Enda bulangna, enda piso tumbuk ladana, enda panahna ras ampik-ampikna. Enggo sikap kerina, janah enda minak takalna. Banci benaken ningen man
Puang Kalimbubunta ah.
Lombit
Hidup Lombit………Lombit jadi pengulu… (lompat-lompat ia).
Ngapeh
Bagenda nge Silih. Duana kam anak beru kami Pa Raja Ngaku ras Nande Raja Ngaku.
Adi enggo me lengkap kerina persikapenna, kuakap banci me benaindu.
Pa Raja Ngaku
O….e, sabar kam kentisik Silih. Uga nande Ngaku, ma enggo sikap !
Nd. Raja Ngaku
Enggo Pak e.
Pa Raja Ngaku
Adi bage Silih, enggo me banci sibenaken.
Ngapeh
Eakh…!! Man kam kerina anak kuta Lau Limpek enda, maka sieteh, erkite-kiteken piga-piga wari si lewat, anak beru kami, Bapa Si Lombit enda, enggo leben nadingken kita, emaka gelah ula kosong pemimpinta, maka sendahme sitangkuhken bebere kami Si Lombit enda jadi pengulu
ibas kutanta enda.
Juak-Juak
(janahna suk-suk kerina)
Hidup pengulu…., hidup pengulu muda…
Lombit
(erdalan-dalan lalap datas panggung, kujah kuje)
Tang-tang peret gebek-gebek…., ih… mantap ka kin pe moranna e de deh.
Ngapeh
Mari dage kujenda Lombit.
Lombit
Enggo kam man Ma…., kari karaben e enggo me kari sikap, enta kutak-takken kari ku Namo Gintung ah, uga pe sada Sibaro kari pasti rulih…
Pa Raja Ngaku
Mari dage permen… gelah tangkuhken ndai kam..
Lombit
Lagia Sibaro, Can-Can pe labo dalih, ahh… naktaken teh-tehku e pe dah.
Ngapeh
Tagangi saja Silih, gelah sibenaken.
Nd. Raja Ngaku
Mari nakku…, yah.. gelah kam nggantiken Kaka Tua marenda.
Lombit
(Kundul ibas kursi si enggo sikapken)
Ena… yah…
Ngapeh
Erkiteken ijenda lit nge panditata Belanda nari, eme Pdt. L. Boodan, emaka ia saja me siban masu-masusa, sebab lebih metunggung nge ia asangken aku kalimbubunna. Erkiteken ia pe langa bo peridiken, emaka gelah iperidi Panditata lebe.
Pa Raja Ngaku
Enggo payo Silih.. Adi bage langsung peridindu Pandita
Pdt. L. Bodaan
Lombik Balus, kupelidi kam, ibas gelal Dibata Bapa,
AnakNa Yesus Klistus, las kesah Si Badia. Amin.
Ngapeh
Langsung pe pasu-pasundu pandita.
Pdt. L. Boodan
O… banci…, banci…. Lombik Balus melgana, ipasu-pasu Tuhan me kam, jadi penggulu Lo Lempek enda. Ampekenlah kelina gegehndu man baNa. Ola kal lit ise pe si mapas man bandu elkiteken kegudanndu, tapi ibas kam melang man Tuhan Debata e lah ipengasepna kam minpin lakyat kuta Lo Lempek Si Malem enda. Man Tuhanlah kemulian se lasa lalap. Amen.
Juak-Juak
(lompat ibas suk-sukna nari)
Hidup pengulu…, hidup pegulu…
Aloopa… lopa… Wa…. Wa….
Nd. Raja Ngaku
Koras…., Koras….., Koras….!
Ngapeh
Jadi, man banta kerina sendah enggo lit pengulunta si mbaru…sebagai tandana baba minak, bulang ras piso tumbuk lada ndai gelah bereken man bana.
Lombit
Jadi aku gundari pengulu Ma…? Ue Bengkila …?
Egia ma banci denga nge aku ngkawil ?
Ngapeh
Ue Lombit. Jadi enda dage si jadi tanda man bandu, kuminaki takalndu, janah pakeken bulang beka buluh enda, janah enda piso tumbuk lada, jadi tanda maka kam pengulu kami.
Pa Raja Ngaku
Adi bage, erkiteken pengulunta anak perana denga, emaka pagi ibereken kesempaten man singuda-nguda kuta enda jadi kemberahenna. Gelah imomokenndu juak-juak. Adi enggo kari dat, sibahan kerja pitu wari pitu berngi, man teruh kita kerina.
Juak-Juak 2
Banci Bengkila….
Juak-Juak 4
Pagi mis baba kami singuda-nguda simerandalna sekitar kuta enda.
Scene 2
Juak-Juak 2
Gundari ilebuh kami si pemena
Kicik
Gelarku Kicik, kutanta Sarang Pua nari, beluh mbayu, ndurung, nggule entabeh.
Aku kalakna melias ras perkeleng.
Adi banci aku jadi kemberahenna Bang Lombit…
Juak-Juak 1, 2, 3, ras 4
Hu……
Lombit
Terus…..
Kicik
Aku erdahin mejingkat, megegeh.., maidahndu biteskue galangna e.
Ma enggo kam tek Bang Lombit ?
Juak-Juak 4
Uga akapndu Pengulu ?
Lombit
Adi kutatap galangna bites adek e, megegeh nge… Terusken lebe.
Tapi kutatap menipes biberna, merambit kuakap ia.
Ketek
Lang aku saja Bang Lombit. Gelarku Ketek, kutaku Namo Sarap nari,
ketek-ketek gia aku, tapi gesit ras lincah. Beluh nami-nami.
Beluh rende ras ngurut. Kurang ja kin akapndu aku ? Ateku min aku jadi kemberahenndu Pengulu.
Lombit
Keritingsa kuakap bukna. Adi keriting biasana ukurna pe keriting.
Melalasa panna mi keriting. Seterusna juak-juak !
Juak-Juak 3
Sipeteluken !
Rugun
Dolat Pengulu, gelarku Rugun, kutanta Namo Can-Can nari, enggo lit duapuluh si nungkuni aku, sada pe la kuueken, kepeken Tuhan nuruh aku kujenda. Emaka ningku, adi banci aku min ateku jadi kemberahenndu.
Lombit
Kam mejilesa, nen dilaki e kam pagi rusur. Terusken juak-juak !
Juak-Juak 4
Iakh…., kam gi … Mari.
Kelawas
Aku gelarku pe labo mejilesa kel ban bapa Pengulu. Gelarku Kelawas beru Ginting, kutanta Lau Silebu nari. Gadung tutung nge rusur kupangani, tapi idahndu e, mburna dagingku e.
Aku Pengulu labo kueteh erkai pe, tapi adi aku jadi kemberahenndu, kuja pe kam kutemani.
Adi engkawil pagi kam, aku kel si mekpek rengitndu Kaka Pengulu…
Lombit
(langsung lompat ibas ingan kundulna nari)
Eith….., sienda me juak-juak. Angkana kel ukurku.
Kicik, Ketek, Rugun
Aku saja Pengulu…. Aku saja pengulu…
Lombit
La banci lebih sada nina Pandita enda, lang empatna pe situhuna labo dalih.
Emaka pasu-pasundu kami Pandita.
Pdt. L. Boodan
Kujenda dage kena duana, gelah kupasu-pasu.
Sijemaken tan kam duana, janah belasken pengakunndu.
Lombit
Aku Si Lombit, Karo mergana, muat kam Si Kelawas beru Ginting Pase jadi ndeharaku. Aku erpadan tetap ngkelengi kam tupung ibas sakit entah sehat, ibas susah entah senang, janah aku erpadan njagai kebadian perjabunta she Dibata nirangken kita alu kematen.
Kelawas
Aku Si Kelawas beru Ginting Pase, mbuat kam si Lombit Karo mergana jadi perbulangenku, aku erpadan tetap nemani kam kuja gia kam pagi Engkawil.
Pdt. L. Boodan
La bagena kata-katana Kelawas. Seri ras Lombit ndai.
Kelawas
O…, aku tetap ngkelengi kam tupung ibas sakit entah pe sehat, ibas susah entah pe senang, janah aku erpadan tetap njaga kebadian perjabunta she Dibata nirangken kita alu kematen.
Pdt. L. Boodan
Erjimpuh dage kam duana, alokenlah pasu-pasu idur Dibata nari.
Lombit ras Kelawas
(erjimpuh duana)
Pdt. L. Boodan
Ipasu-pasu janah ikawali Dibata kam, siang ayo Dibata ersinalsal ibabondu, itatap Dibata ku kam, janah malem atendu ibahanNa. Amin. Ok, tedis kam duana. Selamat ya….
Sora Kerina Pemain
(Sisalam-salamen kerina si reh ras kedua pengantin, sora enterem ngataken selamat)
Selamat pengulu, selamat pengulu…, nyesal kam pagi e… aku ningen.
Siidahen kita pagi pengulu, selamat ya… dst. (lbh kurang stgh menit)
Scene 3
(Suasana : I datas panggung Lombit ras Ndeharana tedis-tedis, ilebe-lebena mentasen anak kuta, lit simbaba galuh, lit sierjujung lau, lit simbaba cangkul, kerina kel mehamat man Pengulu, janah pengulu pe bage, emaka sora terbegi sebagai sound efek sora manuk tekuak, sora babi)
Sound Efek
Mari Pengulu, etah… yah. Mari Eda…, etah nak We…
Mari pengulu…., mari kemberahen….
Kelawas
Aku nak we.., Abang Pengulu e, engkawil atena tiap wari, tapi erkiteken kueteh e hobbina, bagem kuikut-ikut, dungna rukur ka nge ia, labo kepe hobina saja man ukurenken. Perlu ka nge ukurina keperlun temanna. Emaka gundari enggo me ia sadar. Labo ku larang ia engkawil, tapi erkiteken ia pe siperdiateken, maka dung-dungna kita pe perdiatekenna. Adi la kam tek enta kusungkun gia.
La kam engkawil sekalenda Bang ?
Lombit
Lang Dek, Sendah kutemani gia kam rumah, sebab kari berngi ‘puljab’ nina Pandita.
Kelawas
E…uga dehkam… ? Ula kin sirawai rusur bulangenta adi la siakap payo.
Kai kin puljab e Bang ?
Lombit
Perpulungen jabu-jabu.
Kelawas
Adi bage pulung kari kita
Lombit
Aku dehkam dek, kenca enggo iajari Pandita Boodan ah kerna perjabun enda,
Reh jilena kam kuidah tiap-tiap wari. Lang nai ban nggit kam nindu nemani aku engkawil maka kam ku pilih. Temanindu rusur aku engkawil, emaka kutemani ka kam sendah.
Kelawas
Uga bage Bang ?
Lombit
Bage. Gelah lit sinemani aku engkawil, simekpek rengit. Bage ngenca ukurku.
Tapi gundari dehkam, bagi njemak sayat-sayat dek.
Arus kes-kes tagangi, la bage sayatna tan e. Kam pe bage, adi la kelengi, tersayat pusuh e.
Luka ia, ras meser nanamna, emaka lanai bo kam terlupaken dek.
Kelawas
Bujur Pengulu, Mama Karo.
Aku pe dahkam, erkiteken tulus kin kel ukurku ngkelengi kam marenda. Labo erkiteken kam pengulu, tapi kukelengi kin kel ateku kam bang, asa ukurku lit, ras asa pusuhku lit.
Juak-Juak 1
(reh juak-juak menghadap)
Sentabi Pengulu. Lit rayatta sitakilen.
Lombit
Egia ma labo sikenan ?
Juak-Juak 2
Kena kel labo, tapi retap atena tanna e sembelah.
Lombit
E.., berarti ma sikenan nge ?
Juak-Juak 1
Labo kena kel pengulu, sebab kerahungna e nge atena situhuna tampulna.
Juak-Juak 2
Bage Pengulu, tapi erkiteken tangkisna, tanna e sikena. Ma labo kena kel e ?
Lombit
E.. sikenan nge gelarna e Motu.
Juak-Juak 1, 2.
Ha…haa…, enggo kepe kam peintar Pengulu.
Juak-Juak 1
Jadi arus sidameken e Pengulu
Lombit
Kai kin masalahna
Juak-Juak 2
Baleng taneh, nina.
Lombit
Baleng ? Bage denga belangna taneh Lau Limpek enda…
Juak-Juak 3
(Reh alu kiam ngelapor man Pengulu)
Sentabi Pengulu…., Ulihken Nande Gadung atena Pa Gadung…
Lombit
E… kai ka sebabna ?
Juak-Juak 3
La berena man anak ras ndeharana, erjudi saja lalap dahinna.
Lombit
Judi ? Lit denga kin judi kutanta enda ?
Juak-Juak 3
Judi kel tiap wari kede Pa Semen ah Pengulu, dadu, joker Karo, satur….
Kelawas
Uga maka ndehara ngulihken perbapan ?
Juak-Juak 3
Enam ia Kemberahen, gelah enggo itehndu ras pengulu
Juak-Juak 4
(anahna kiam erkesah-kesah, ngelaporka man Pengulu)
Dolat Pengulu ! Dolat Pengulu !
Lombit
Kai anak ? Tenang.., tenang, bagi siayak-ayak Kompeni kuidah kam tempat.
Juak-Juak 4
Payo Pengulu. Apai la nggalar blasting ku geleh nina Gojo
Lombit
Ise kin Gojo e ?
Juak-Juak 4
Ia anak Pengulu Pelangkah, Namo Linting nari, ia me simehantuna sekitar enda.
Uga siban e ngatasisa ? Rakyatta she biarna man bana…
Lombit
Adi bage, aku la kuakap puas hanya megiken laporen saja. Gundari berkat kita ku jah, gelah sidameken seninta enda. Sebab la mehuli lit sirubat-rubat ibas kita sada kuta enda, apai ka kita enggo igelari anak-anak Tuhan.
Juak-Juak 2
Berkat dage kita Pengulu.
Lombit
Eta… yah. Berkat kita. La kepe kueteh kai siterjadi selama enda ibas kuata enda. Kepe jadi sierjabaten ningen e la hanya gelar saja, la nerima laporen saja, tapi arus eteh uga rayat si rulo e. Adi bage ras-ras dage kita kujah, gelah sidarami jalan keluarna si payo, singena ate Dibata.
Kelawas
Ula kena lupa ertoto nake, pindo gegeh man Dibata, gelah ia kari nuduhken dalan.
Juak-Juak 1
Ue kemberahen. Eta dage Pengulu…
Juak-Juak 2
Kawilndu uga Pengulu la sibaba ??
Lombit
Sekalenda lang. Labo salah engkawil, tapi inget kai si penting.
Etah ya… ula kari melawensa. Berkat kita.
Kelawas
Timai Nake…. Aku pe ikut saja Pak…, kemberahen pe perlu nge tehna rayatna
(Kerina berkat, ndarat bas panggung nari)
Bj. Menteng – Karawaci, 13 Oktober 2005.
PENGULU LAU LIMPEK
Karya : Pt. J.P. Limbeng
Sinopsis :
Drama enda menceritaken kerna sekalak pengulu singuda denga, entahpe anak perana denga, janah agak ngulah sitik. Ia iangkat jadi Pengulu nggantiken orang tuana erkiteken orang tuana enggo leben dilo Dibata, erkiteken sakit kolera. Ibas kengudanna e, tentuna ia membutuhken bimbingen, eme bengkilana. Janah bagepe perempona pe man aturenken, sebab perlu lit kemberahenna. Amin gia si Lombit sebagai Pengulu nguda, janah kurang pemetehna erkiteken otakna kurang kencer, tapi erkiteken pengarak-ngarak Dibata, maka kepemimpinenna erdalan alu mehuli. La kepe gegeh manusia sierbahan, tapi bekas penjujuri Dibata.
Drama enda ikemas alu penuh humor, tapi pe penekanen theologiana iusahaken kental. Drama enda tentuna fiksi saja sifatna, entah pe lit seri gelar ibas drama enda, tentuna secara kebetulen saja, janah labo lit sitik pe maksud-maksud tertentu.
Scene 1
Pa Raja Ngaku
(Idatas panggung teridah Bengkila Lombit ras Bibina alu rukur janahna njemak isangna, erdalan-dalan ia, janah tatapna ndauh, tempa-tempa gulut kel ukurna).
Jadi uga dage Mak, ma enggo sikap kerina banndu ?
Nd. Raja Ngaku
Enggo Pak e, minak tualahna pe enggo kupesikap.
Pa Raja Ngaku
Uga kin akapndu permenta e, enggo me akapndu banci ?
Nd. Raja Ngaku
Banci kai kin nindu e ?
Pa Raja Ngaku
Banci…., jadi pengulu kuta enda..
Nd. Raja Ngaku
Ajari bancina nge Pak e, jong nguda e pe adi paraken metua nge.
Pa Raja Ngaku
Entah sikapen nge aku jadi pengulu ateku Mak.
Nd. Raja Ngaku
Oh…, kam. Ula kam bage ya…
Kelawesen Kaka Tua ndai pe sedak denga kuakap ngukurkenca.
Pa Raja Ngaku
Entah nge ningku ndai, gelarna pe entah…
(Terbegi sora tanduk darat nari ras sora penganak, janah juak-juak erlebuh, janah empat kalak ngelanja Pengulu Muda sitergelar Lombit Pengulu Lau Liimpek, iarakken anak kuta. Rombongen e siikut eme, Nande Lombit, 4 kalak juak-juak, Ngapeh, mamana, bagepe Pdt. L.``Boodan, Belanda nari, sekalak sinngkipasisa)
Juak-Juak 1
Momo…. Momo….!! Pengulu Muda mentas…. 3 x
Pa Raja Ngaku
Iakh… enggo reh permenta ndai Mak, sikap kita.
Juak-Juak 1
Momo…, Momo… Pengulu Muda mentas…..
(Rombongen Pengulu Muda bengket ku panggung ilanja 4 kalak juak-juakna)
Juak-Juak 2
Dolat Pengulu ! Nusurken, nggo kita seh.
Lombit
Nggo dage kita seh Koro ?
Juak-Juak 2
Dolat Pengulu ! Enggo seh, nusurken Pengulu….
Lombit
Mejuah-juah Bengkila, Bi…, (angkatna tanna). Nusur dage aku Bi ?
Nd. Raja Ngaku
Ue Lombit, nusurken dage permen Bibina. (Langsung tangis)
Hu……, uga denga kel nge permen bibina, adi Kaka Tua enggo lawes…
Kam pe kuidah labo dem kel sengkibul, uga nge nindu pagi minpin kuta Lau Limpek enda turang..
Hu……, hu….
Lombit
Ngandung kam e Bi ?
Nd. Raja Ngaku
Uga denga nge deba kuban man bangku Kaka Tua, bekas penadingkenddu e..
Lombit …., permen bibina…. Hu….
Pa Raja Ngaku
Enggo me Mak. Enggo, enggo.. (ia pe mis ngandung)
Hu….., Uga dengalah e Lombit ? Ngasep nge kam e Permen ?
Lombit
Ngasep Bengkila, adi nusur kel nge katandu, enta lompat gia aku pe.
Satu…, dua…., tiga……(nusur ia ibas kursi tandu nari).
Juak-Juak 1, 2, 3, ras 4
Hidup Pengulu…., Hidup Pengulu….., Hidup Pengulu…..!!
Lombit
Eh…, deh kam ngasup nge aku nusur Bengkila…
Juak-Juak 3
Dolat Pengulu. Kawilndu Pengulu…. (janah mereken moran)
Lombit
(alokenna, mis tak-takkenna)
Tang-tang peret gebek-gebek….., enggo dat sada nande Biring
Bengkota kari…..Hu….
Juak-Juak 1, 2, 3 ras 4
Hidup Pengulu….., hidup Pengulu……
Pa Raja Ngaku
Yach… labo bage Nande Raja Ngaku. Adi enggo me sikap kerina, siaturken dage, gelah sibenaken acara penangkuhen permenta enda ndai.
Nd. Raja Ngaku
Enggo Pak e. Enda bulangna, enda piso tumbuk ladana, enda panahna ras ampik-ampikna. Enggo sikap kerina, janah enda minak takalna. Banci benaken ningen man
Puang Kalimbubunta ah.
Lombit
Hidup Lombit………Lombit jadi pengulu… (lompat-lompat ia).
Ngapeh
Bagenda nge Silih. Duana kam anak beru kami Pa Raja Ngaku ras Nande Raja Ngaku.
Adi enggo me lengkap kerina persikapenna, kuakap banci me benaindu.
Pa Raja Ngaku
O….e, sabar kam kentisik Silih. Uga nande Ngaku, ma enggo sikap !
Nd. Raja Ngaku
Enggo Pak e.
Pa Raja Ngaku
Adi bage Silih, enggo me banci sibenaken.
Ngapeh
Eakh…!! Man kam kerina anak kuta Lau Limpek enda, maka sieteh, erkite-kiteken piga-piga wari si lewat, anak beru kami, Bapa Si Lombit enda, enggo leben nadingken kita, emaka gelah ula kosong pemimpinta, maka sendahme sitangkuhken bebere kami Si Lombit enda jadi pengulu
ibas kutanta enda.
Juak-Juak
(janahna suk-suk kerina)
Hidup pengulu…., hidup pengulu muda…
Lombit
(erdalan-dalan lalap datas panggung, kujah kuje)
Tang-tang peret gebek-gebek…., ih… mantap ka kin pe moranna e de deh.
Ngapeh
Mari dage kujenda Lombit.
Lombit
Enggo kam man Ma…., kari karaben e enggo me kari sikap, enta kutak-takken kari ku Namo Gintung ah, uga pe sada Sibaro kari pasti rulih…
Pa Raja Ngaku
Mari dage permen… gelah tangkuhken ndai kam..
Lombit
Lagia Sibaro, Can-Can pe labo dalih, ahh… naktaken teh-tehku e pe dah.
Ngapeh
Tagangi saja Silih, gelah sibenaken.
Nd. Raja Ngaku
Mari nakku…, yah.. gelah kam nggantiken Kaka Tua marenda.
Lombit
(Kundul ibas kursi si enggo sikapken)
Ena… yah…
Ngapeh
Erkiteken ijenda lit nge panditata Belanda nari, eme Pdt. L. Boodan, emaka ia saja me siban masu-masusa, sebab lebih metunggung nge ia asangken aku kalimbubunna. Erkiteken ia pe langa bo peridiken, emaka gelah iperidi Panditata lebe.
Pa Raja Ngaku
Enggo payo Silih.. Adi bage langsung peridindu Pandita
Pdt. L. Bodaan
Lombik Balus, kupelidi kam, ibas gelal Dibata Bapa,
AnakNa Yesus Klistus, las kesah Si Badia. Amin.
Ngapeh
Langsung pe pasu-pasundu pandita.
Pdt. L. Boodan
O… banci…, banci…. Lombik Balus melgana, ipasu-pasu Tuhan me kam, jadi penggulu Lo Lempek enda. Ampekenlah kelina gegehndu man baNa. Ola kal lit ise pe si mapas man bandu elkiteken kegudanndu, tapi ibas kam melang man Tuhan Debata e lah ipengasepna kam minpin lakyat kuta Lo Lempek Si Malem enda. Man Tuhanlah kemulian se lasa lalap. Amen.
Juak-Juak
(lompat ibas suk-sukna nari)
Hidup pengulu…, hidup pegulu…
Aloopa… lopa… Wa…. Wa….
Nd. Raja Ngaku
Koras…., Koras….., Koras….!
Ngapeh
Jadi, man banta kerina sendah enggo lit pengulunta si mbaru…sebagai tandana baba minak, bulang ras piso tumbuk lada ndai gelah bereken man bana.
Lombit
Jadi aku gundari pengulu Ma…? Ue Bengkila …?
Egia ma banci denga nge aku ngkawil ?
Ngapeh
Ue Lombit. Jadi enda dage si jadi tanda man bandu, kuminaki takalndu, janah pakeken bulang beka buluh enda, janah enda piso tumbuk lada, jadi tanda maka kam pengulu kami.
Pa Raja Ngaku
Adi bage, erkiteken pengulunta anak perana denga, emaka pagi ibereken kesempaten man singuda-nguda kuta enda jadi kemberahenna. Gelah imomokenndu juak-juak. Adi enggo kari dat, sibahan kerja pitu wari pitu berngi, man teruh kita kerina.
Juak-Juak 2
Banci Bengkila….
Juak-Juak 4
Pagi mis baba kami singuda-nguda simerandalna sekitar kuta enda.
Scene 2
Juak-Juak 2
Gundari ilebuh kami si pemena
Kicik
Gelarku Kicik, kutanta Sarang Pua nari, beluh mbayu, ndurung, nggule entabeh.
Aku kalakna melias ras perkeleng.
Adi banci aku jadi kemberahenna Bang Lombit…
Juak-Juak 1, 2, 3, ras 4
Hu……
Lombit
Terus…..
Kicik
Aku erdahin mejingkat, megegeh.., maidahndu biteskue galangna e.
Ma enggo kam tek Bang Lombit ?
Juak-Juak 4
Uga akapndu Pengulu ?
Lombit
Adi kutatap galangna bites adek e, megegeh nge… Terusken lebe.
Tapi kutatap menipes biberna, merambit kuakap ia.
Ketek
Lang aku saja Bang Lombit. Gelarku Ketek, kutaku Namo Sarap nari,
ketek-ketek gia aku, tapi gesit ras lincah. Beluh nami-nami.
Beluh rende ras ngurut. Kurang ja kin akapndu aku ? Ateku min aku jadi kemberahenndu Pengulu.
Lombit
Keritingsa kuakap bukna. Adi keriting biasana ukurna pe keriting.
Melalasa panna mi keriting. Seterusna juak-juak !
Juak-Juak 3
Sipeteluken !
Rugun
Dolat Pengulu, gelarku Rugun, kutanta Namo Can-Can nari, enggo lit duapuluh si nungkuni aku, sada pe la kuueken, kepeken Tuhan nuruh aku kujenda. Emaka ningku, adi banci aku min ateku jadi kemberahenndu.
Lombit
Kam mejilesa, nen dilaki e kam pagi rusur. Terusken juak-juak !
Juak-Juak 4
Iakh…., kam gi … Mari.
Kelawas
Aku gelarku pe labo mejilesa kel ban bapa Pengulu. Gelarku Kelawas beru Ginting, kutanta Lau Silebu nari. Gadung tutung nge rusur kupangani, tapi idahndu e, mburna dagingku e.
Aku Pengulu labo kueteh erkai pe, tapi adi aku jadi kemberahenndu, kuja pe kam kutemani.
Adi engkawil pagi kam, aku kel si mekpek rengitndu Kaka Pengulu…
Lombit
(langsung lompat ibas ingan kundulna nari)
Eith….., sienda me juak-juak. Angkana kel ukurku.
Kicik, Ketek, Rugun
Aku saja Pengulu…. Aku saja pengulu…
Lombit
La banci lebih sada nina Pandita enda, lang empatna pe situhuna labo dalih.
Emaka pasu-pasundu kami Pandita.
Pdt. L. Boodan
Kujenda dage kena duana, gelah kupasu-pasu.
Sijemaken tan kam duana, janah belasken pengakunndu.
Lombit
Aku Si Lombit, Karo mergana, muat kam Si Kelawas beru Ginting Pase jadi ndeharaku. Aku erpadan tetap ngkelengi kam tupung ibas sakit entah sehat, ibas susah entah senang, janah aku erpadan njagai kebadian perjabunta she Dibata nirangken kita alu kematen.
Kelawas
Aku Si Kelawas beru Ginting Pase, mbuat kam si Lombit Karo mergana jadi perbulangenku, aku erpadan tetap nemani kam kuja gia kam pagi Engkawil.
Pdt. L. Boodan
La bagena kata-katana Kelawas. Seri ras Lombit ndai.
Kelawas
O…, aku tetap ngkelengi kam tupung ibas sakit entah pe sehat, ibas susah entah pe senang, janah aku erpadan tetap njaga kebadian perjabunta she Dibata nirangken kita alu kematen.
Pdt. L. Boodan
Erjimpuh dage kam duana, alokenlah pasu-pasu idur Dibata nari.
Lombit ras Kelawas
(erjimpuh duana)
Pdt. L. Boodan
Ipasu-pasu janah ikawali Dibata kam, siang ayo Dibata ersinalsal ibabondu, itatap Dibata ku kam, janah malem atendu ibahanNa. Amin. Ok, tedis kam duana. Selamat ya….
Sora Kerina Pemain
(Sisalam-salamen kerina si reh ras kedua pengantin, sora enterem ngataken selamat)
Selamat pengulu, selamat pengulu…, nyesal kam pagi e… aku ningen.
Siidahen kita pagi pengulu, selamat ya… dst. (lbh kurang stgh menit)
Scene 3
(Suasana : I datas panggung Lombit ras Ndeharana tedis-tedis, ilebe-lebena mentasen anak kuta, lit simbaba galuh, lit sierjujung lau, lit simbaba cangkul, kerina kel mehamat man Pengulu, janah pengulu pe bage, emaka sora terbegi sebagai sound efek sora manuk tekuak, sora babi)
Sound Efek
Mari Pengulu, etah… yah. Mari Eda…, etah nak We…
Mari pengulu…., mari kemberahen….
Kelawas
Aku nak we.., Abang Pengulu e, engkawil atena tiap wari, tapi erkiteken kueteh e hobbina, bagem kuikut-ikut, dungna rukur ka nge ia, labo kepe hobina saja man ukurenken. Perlu ka nge ukurina keperlun temanna. Emaka gundari enggo me ia sadar. Labo ku larang ia engkawil, tapi erkiteken ia pe siperdiateken, maka dung-dungna kita pe perdiatekenna. Adi la kam tek enta kusungkun gia.
La kam engkawil sekalenda Bang ?
Lombit
Lang Dek, Sendah kutemani gia kam rumah, sebab kari berngi ‘puljab’ nina Pandita.
Kelawas
E…uga dehkam… ? Ula kin sirawai rusur bulangenta adi la siakap payo.
Kai kin puljab e Bang ?
Lombit
Perpulungen jabu-jabu.
Kelawas
Adi bage pulung kari kita
Lombit
Aku dehkam dek, kenca enggo iajari Pandita Boodan ah kerna perjabun enda,
Reh jilena kam kuidah tiap-tiap wari. Lang nai ban nggit kam nindu nemani aku engkawil maka kam ku pilih. Temanindu rusur aku engkawil, emaka kutemani ka kam sendah.
Kelawas
Uga bage Bang ?
Lombit
Bage. Gelah lit sinemani aku engkawil, simekpek rengit. Bage ngenca ukurku.
Tapi gundari dehkam, bagi njemak sayat-sayat dek.
Arus kes-kes tagangi, la bage sayatna tan e. Kam pe bage, adi la kelengi, tersayat pusuh e.
Luka ia, ras meser nanamna, emaka lanai bo kam terlupaken dek.
Kelawas
Bujur Pengulu, Mama Karo.
Aku pe dahkam, erkiteken tulus kin kel ukurku ngkelengi kam marenda. Labo erkiteken kam pengulu, tapi kukelengi kin kel ateku kam bang, asa ukurku lit, ras asa pusuhku lit.
Juak-Juak 1
(reh juak-juak menghadap)
Sentabi Pengulu. Lit rayatta sitakilen.
Lombit
Egia ma labo sikenan ?
Juak-Juak 2
Kena kel labo, tapi retap atena tanna e sembelah.
Lombit
E.., berarti ma sikenan nge ?
Juak-Juak 1
Labo kena kel pengulu, sebab kerahungna e nge atena situhuna tampulna.
Juak-Juak 2
Bage Pengulu, tapi erkiteken tangkisna, tanna e sikena. Ma labo kena kel e ?
Lombit
E.. sikenan nge gelarna e Motu.
Juak-Juak 1, 2.
Ha…haa…, enggo kepe kam peintar Pengulu.
Juak-Juak 1
Jadi arus sidameken e Pengulu
Lombit
Kai kin masalahna
Juak-Juak 2
Baleng taneh, nina.
Lombit
Baleng ? Bage denga belangna taneh Lau Limpek enda…
Juak-Juak 3
(Reh alu kiam ngelapor man Pengulu)
Sentabi Pengulu…., Ulihken Nande Gadung atena Pa Gadung…
Lombit
E… kai ka sebabna ?
Juak-Juak 3
La berena man anak ras ndeharana, erjudi saja lalap dahinna.
Lombit
Judi ? Lit denga kin judi kutanta enda ?
Juak-Juak 3
Judi kel tiap wari kede Pa Semen ah Pengulu, dadu, joker Karo, satur….
Kelawas
Uga maka ndehara ngulihken perbapan ?
Juak-Juak 3
Enam ia Kemberahen, gelah enggo itehndu ras pengulu
Juak-Juak 4
(anahna kiam erkesah-kesah, ngelaporka man Pengulu)
Dolat Pengulu ! Dolat Pengulu !
Lombit
Kai anak ? Tenang.., tenang, bagi siayak-ayak Kompeni kuidah kam tempat.
Juak-Juak 4
Payo Pengulu. Apai la nggalar blasting ku geleh nina Gojo
Lombit
Ise kin Gojo e ?
Juak-Juak 4
Ia anak Pengulu Pelangkah, Namo Linting nari, ia me simehantuna sekitar enda.
Uga siban e ngatasisa ? Rakyatta she biarna man bana…
Lombit
Adi bage, aku la kuakap puas hanya megiken laporen saja. Gundari berkat kita ku jah, gelah sidameken seninta enda. Sebab la mehuli lit sirubat-rubat ibas kita sada kuta enda, apai ka kita enggo igelari anak-anak Tuhan.
Juak-Juak 2
Berkat dage kita Pengulu.
Lombit
Eta… yah. Berkat kita. La kepe kueteh kai siterjadi selama enda ibas kuata enda. Kepe jadi sierjabaten ningen e la hanya gelar saja, la nerima laporen saja, tapi arus eteh uga rayat si rulo e. Adi bage ras-ras dage kita kujah, gelah sidarami jalan keluarna si payo, singena ate Dibata.
Kelawas
Ula kena lupa ertoto nake, pindo gegeh man Dibata, gelah ia kari nuduhken dalan.
Juak-Juak 1
Ue kemberahen. Eta dage Pengulu…
Juak-Juak 2
Kawilndu uga Pengulu la sibaba ??
Lombit
Sekalenda lang. Labo salah engkawil, tapi inget kai si penting.
Etah ya… ula kari melawensa. Berkat kita.
Kelawas
Timai Nake…. Aku pe ikut saja Pak…, kemberahen pe perlu nge tehna rayatna
(Kerina berkat, ndarat bas panggung nari)
Bj. Menteng – Karawaci, 13 Oktober 2005.
Subscribe to:
Posts (Atom)
